Euskararen Bihozfera

Gernikan ospatuko da 2014ko Ibilaldia, eta jaia antolatuko duen Seber Altube ikastolako arduradunek oso argi zehaztu ziguten lortu gura dutena: helburua Ibilaldia eskualde osoarena izatea da, eta eskualdeko herritarrak harro sentitu daitezela euren euskalduntasunaz eta bertako euskararen aberastasunaz. Bat etorri ginen mezu horrekin, Euskal Herri osoko euskaltzaleei begira ere ezagutzera emateko modukoa baita Busturialdearen euskalduntasuna: % 80tik gora dira euskaldunak eta euskalkiak bizi-bizirik daude.

Urdaibai biosfera-erreserba Busturialdean bertan egonik, berezkoa zen lotura: Busturialdea euskararen biosfera da. Horri Seber Altubek eskualdean duen garrantzia gehitu nahi genion, ikastolak berak zein bertan ikasitako herritarrek bizi handia ematen baitiote eskualdearen zein euskararen herri-bizitzari. Seber Altube euskararen biosferaren bihotza dela iritzi genion. Eta bageneukan leloa: Euskararen Bihozfera.

Komunikazio estrategia eta lelo horrekin, bada, hauek dira 2014an Busturialdean egingo den Ibilaldiaren hiru mezu ardatzak:

· Euskara sorkuntza kolektiboa eta dibertsoa da: zenbat euskaldun, hainbat euskara eta euskaraz bizitzeko hainbat modu
· Biosfera bateko izaki bizidunek legez, euskaldunek eta euskaltzaleek euskararen dibertsitatea eta garapena zaindu dezakete
· Seber Altuben bihotzez bizi dute euskara eta Seberkideak bihotzez bizi dira euskaraz: maitasunez, bizipozez eta plazerrez

Eta komunikazio estrategia horren izpiritua eroan dugu irudigintzara ere: Seber Altubera jo genuen, bihotzera; bertako ikasle, guraso eta hezitzaileek  ikastola, euskara, dibertsitatea, bizipoza… zelan ikusten dituzten jakiteko tailerra antolatu genuen zapatu goiz batean; ondoren, tailerreko marrazkiek osaturiko bihozfera oso horri bizia eman genion, mugimenduan jarriz eta koloreztatuz; eta logotipoaren inspirazio iturri ere gertatu zitzaigun bihozfera hori. Urte osoa iraungo duen kanpainaren erakunde nortasun osoa, beraz, horixe da: Seber Altuben sortu, Busturialde osoan bizia eman, eta euskal herritar guztiek bisitatuko duten euskararen bihozfera. Bideo honetan ikusi dezakezue prozesu osoa.