Bizipoza auzolan

Euskal Herriko haurrei eta familiei harreman esparru hezitzailea eskaini nahi die Irrien Lagunak Klubak, eta harreman esparru horren baitan aspaldi lantzen diharduten elkartasun proiektuari izaera bereiztua emateko eta jendartean nabarmentzeko guregana etorri ziren bertako kideak.

Irrien Lagunak klubeko elkartasun proiektua premia bereziak dituzten haur eta familien elkarteei bisualizazioan, sentsibilizazioan eta baliabideetan laguntzeko sarea da; euskaraz, auzolanean eta bizipozez diharduena. Gaur egun 21 elkartek osatzen dute sarea, eta hazteko aukera zabalik du, premia gehiagori erantzuteko zein geografikoki Euskal Herri osoan hedatzeko. Elkarte horiei ez ezik, Irrien Lagunak Klubeko kideei eta horien bitartez euskal jendarte osoari zuzentzen zaie: premia bereziak dituzten haurrei kidetza afektiboa ez ezik laguntza efektiboa eskaintzea dute helburu,  baliabideak bilduz eta bolondres sarea osatuz.

Izaera horrekin, posizionamendu estrategikoa zehaztu eta marka nortasuna lantzeari ekin genion: Irrien Lagunak marka nagusi ezagunaren baitan kokatuta, nortasun bereiztua eman behar genion proiektuari. Irrien Lagunak izena mantenduz, deitura deskribatzaile egokia behar genuen, eta balio eskaintza egingo zuen marka-aldarri bereizgarria. Iruditeriari dagokionez ere, marka nagusiarekiko lotura zaindu baina aldi berean berezko nortasuna eman behar genion.

Luze hausnartu genuen elkartasunaz eta berau ulertzeko Irrien Lagunek duten ikuspegiaz: laguntza, babes, karitate eta antzeko adieratatik harago, elkarren kidetza eta elkarren poza du ipar proiektu honek. Gizartegintza eredu bat: eman eta jaso; bi, hiru, lau eta ehunka norabidetan. Hala bada, “gizartegintza” ipini diogu deitura deskribatzaile moduan, balio eskaintza marka-aldarrian jarriz: “bizipoza auzolan”.