Komunikazioa ardatz hartuta, Ibaizabal ikastetxean

Erronka polita izan dute oraingoan Ibaizabal Ikastolako Haur Hezkuntzako goi mailako zikloko ikasleek: otsailean zehar Plateruenan egingo dituzten bost antzerkiak iragartzeko kartelak eta eskuorriak sortu behar izan dituzte. Askorentzat arlo hau guztiz ezezaguna denez, di-dari eskatu diote laguntza.

Horrela, Nagore Txintxurretak saio berezi bat prestatu zuen komunikazio prozesuaz hitz egin eta diseinuaz zenbait gomendio emateko.

Komunikazioa prozesu oso eta kohesionatu bat dela azpimarratu genuen. Hartzailearen garrantzia azpimarratu genuen, eta, ondorioz, hartzaileak eta sortzen dugun mezuak bat egin behar dutela ikusarazi genien, eta komunikazioan eragina duten elementuez jardun ginen ondoren: tipografia motak, koloreen harmoniak, euskarrien formatua eta estiloa, besteak beste. Mezua ulergarria eta eraginkorra izan dadin, euskarri guztiek koherentziari eutsi behar diotela azaldu genien, eta zenbait kanpainatako adibideak ikusi genituen. Kartelgintzari dagokionez, hainbat estilotako ereduak ikusi genituen: argazkiak, ilustrazioak, collageak eta abar erabiliz egindako kartelak. Teknika edozein izanda ere, sinpleagoa zein konplexuagoa izan, ideia on bat izatea da gakoa.

Diseinuari dagokionez, beraien lanean lagungarri izango zitzaizkien gomendioak eman genizkien: edukiak antolatzeko orduan, hierarkizazioak eta ordena mantentzea ulergarritasunaren mesedetan. Margenak, zuriuneak errespetatzea elementuek arnasa har dezaten. Elementuen lerrokatzeak errespetatzea kartela orekatua izan dadin. Tipografia familia ezberdin asko erabili beharrean, asko jota, pare bat erabiltzea. Kolore harmoniak sortu eta kolore gamak zehaztea ere beharrezkoa dela aipatu genuen.

Saioaren bigarren zatian, taldetan banatuta zeuden ikasleen planteamenduak ikusi genituen. Bakoitzak bere antzerkiaren izena asmatzeaz gain, honen esentzia kartel baten nola islatu nahi zuten  aztertu genuen. Hasierako fase honetan, ordenagailuak itzali, papera era arkatza hartu eta zirriborroekin hasi ziren.

Ikasitakoa  praktikan jarri zuten eta zirriborroak kartel bihurtu zituzten.