Euskara praktikoa

AEK Matrikulazio kanpaina 2013 from di-da on Vimeo.

Kaleko zurrumurruek ez ezik, ikerketa soziolinguistikoek ere hala diote: euskara ikasleek praktikotasuna eskatzen dute. Euskarak ikasteko hizkuntza zaila izateko estigma du: “ia ezinezkoa heldua zarenean” dio askok. Euskararen irakaskuntza modua, berriz, formalegia omen da: “ludikoagoa behar luke”. Azkenik, euskara ikasi nahi duen asko ez dabil maila altu edo titulu bila: “nik komunikatzeko beste jakin nahi dut”.

AEK-k eskari horiei guztiei erantzuteko eskaintza eta promesa hori sostengatzeko argudioak dauzka: AEK-ko euskaltegiek 30 urte daramatzate euskara arrakastaz irakasten, eta 50.000 herritar euskaldundu ditu; AEK-n lehenengo egunetik gozatuko duzu euskara, erabileran oinarritutako metodologiarekin; eta AEK-n nahi eta behar duzun beste ikasiko duzu, ordutegi eta modulazio malguekin.

Eta matrikulazio kanpainarako ere praktikotasuna bilatu dugu. Post-ita hartu dugu sorkuntzarako ardatz moduan: elementu praktikoa eta hizkuntzen ikaskuntzarekin lotua, eguneroko leku, gailu eta abarrak izendatzeko. Post-ita ardatz hartuta, beraz, AEK-k euskara ikasleei helarazi nahi dizkien mezu guztiak grafikoetara eta bideora eramateko irudigintza landu dugu, eta AEK-ko kideek kaleko markagintza egiteko post-itak inprimatu ditugu. Praktikotasunaren ideiatik tiraka, gainera, hainbat arlorekin lotutako oinarrizko hiztegiak ere prestatu ditugu kalean banatzeko, eta matrikulaziorako websitea erabilterraz eta argibidez hornitua diseinatu dugu.